އެމްޑީޕީގެ ގައުމީ މަޖިލީހުގެ ބައްދަލުވުމުގައި އެޕާޓީގެ އިސް ބޭފުޅުން ބައިވެރިވެވަޑައިގަންނަވަނީ. ފޮޓޯ: އެމްޑީޕީ
ސަރުކާރުގެ ކުންފުނިތަކުގައި މަސައްކަތްކުރާ މުވައްޒަފުން ސިޔާސީ ގޮތުން ވަޒީފާއިން ވަކިކުރާ ކަމަށް ބުނެ، އެކަމާ ދެކޮޅަށް މި ހަފުތާގެ ބުރާސްފަތި ދުވަހު މުޅި ރާއްޖޭގައި ބޮޑު އިހުތިޖާޖެއް ބޭއްވުމަށް އެމްޑީޕީން ނިންމައިފިއެވެ.
މިގޮތަށް ނިންމާފައިވަނީ މިރޭ ބޭއްވި އެމްޑީޕީގެ ގައުމީ މަޖިލީހުގެ ބައްދަލުވުމުގައެވެ. މިއީ ކުރީގެ ރައީސް މުހައްމަދު ނަޝީދު އެމްޑީޕީގެ ޗެއާޕާސަން ކަމާ ހަވާލުވެވަޑައިގަތް ފަހުން ބޭއްވި ފުރަތަމަ ގައުމީ މަޖިލީހުގެ ބައްދަލުވުމެވެ. ނަޝީދު ރިޔާސަތުގައި އިންނަވައިގެން ފާސްކުރި ގަރާރުގައި ބަޔާންކޮށްފައިވަނީ، ރައީސް ޑރ. މުހައްމަދު މުއިއްޒުގެ ސަރުކާރުން ގާނޫނާއި ގަވާއިދާ ހިލާފަށް ކުރަމުންދާ ކަންކަމުގެ ސަބަބުން ރައްޔިތުންނަށް ބޮޑެތި ތަކުލީފުތަކެއް އުފުލަން ޖެހިފައިވާ ކަމަށެވެ.
އެމްޑީޕީގެ ސެކްރެޓޭރިއެޓުން ހުށަހެޅި މި ގަރާރުގައި މައިގަނޑު ގޮތެއްގައި ދެ ކަންބޮޑުވުމެއް ފާހަގަކޮށްފައިވެއެވެ.
މަޝްރޫއުތައް ހުއްޓިފައި އޮތުން: ކުރީގެ ސަރުކާރުން ފަށާފައިވާ ތަރައްގީގެ މަޝްރޫއުތައް، ހާއްސަކޮށް ރަށްރަށުގެ ފެނާއި ނަރުދަމާ އަދި ކަރަންޓުގެ މަސައްކަތްތައް ހުއްޓިފައިވާ މައްސަލަ. މީގެ ތެރޭގައި ނިމެން ގާތްވެފައިވާ ޕްރޮޖެކްޓްތައް ވެސް ހިމެނޭ.
.ވަޒީފާއިން ވަކިކުރުން: ސަރުކާރުގެ ކުންފުނިތަކުގައި ތިބި އެމްޑީޕީއަށް ތާއީދުކުރާ މުވައްޒަފުން އެއްވެސް އިންސާފެއް ނެތި، ސިޔާސީ ބޭނުމަށްޓަކައި ވަޒީފާއިން ވަކިކުރަމުންދާ މައްސަލަ.
މިރޭގެ ބައްދަލުވުމަށް ހާޒިރުވި މެންބަރުންގެ އިއްތިފާގުން ފާސްކުރި މި ގަރާރުގެ ދަށުން، ބުރާސްފަތި ދުވަހު ބާއްވާ އިހުތިޖާޖުގެ އިތުރުން، ވަޒީފާ ގެއްލޭ މުވައްޒަފުންނަށް ގާނޫނީ އެހީތެރިކަން ފޯރުކޮށްދިނުމަށްވެސް އެމްޑީޕީން ވަނީ ނިންމާފައެވެ.
ކޮމެންޓް