އުމުރުން 84 އަހަރުގައި އަލަތު ހައްޖަށް، ބައިވެރިއެއްގެ ގޮތުގައި އިހުތިޔާރުކުރީ ލޯބިވާ ކޮއްކޮ

މޮރޮކޯގެ ރަބާތު-ސަލޭ އިންޓަނޭޝަނަލް އެއާޕޯޓުގައި ގާއިމުކޮށްފައިވާ ”މައްކާ ރޫޓް އިނީޝިއޭޓިވް“ ގެ ހާއްސަ މާލަމުގައި، އުމުރުން 84 އަހަރުގެ އައިޝާ އަލް-ޒާހިރު ހުރީ މާތްވެގެންވާ ހައްޖުގެ އަޅުކަން އަދާކުރުމަށް މައްކާއަށް ދިއުމަށް ތައްޔާރުވެގެންނެވެ. ފަސް ކުދިންގެ މަންމައެއް ކަމަށްވާ އައިޝާއަކީ މި މަތިވެރި ދަތުރަށްޓަކައި އެތައް އަހަރެއް ވަންދެން އިންތިޒާރުކޮށް، ދަތުރު ފަސޭހަކޮށްދެއްވުމަށާއި އަޅުކަން ގަބޫލުކުރެއްވުމަށް އެދި މާތްﷲގެ ހަޟްރަތުގައި ދުޢާދަންނަވަމުންދިޔަ މީހެކެވެ.

ދުވަސްވުމުގެ ސަބަބުން މޫނުމަތިން ފެންނަން ހުރި ހިނިތުންވުމާއެކު، އޭނާ ފާޅުކުރީ ނުހަނު ބޮޑު އުފާވެރިކަމާއި ޝުކުރުވެރިކަމުގެ އިހުސާސްތަކެވެ. އެއާޕޯޓަށް އައި ވަގުތުން ފެށިގެން ކަންކަން ހަމަޖެހިގެންދިޔަ ފަސޭހަގޮތްތަކުގެ ސަބަބުން، ދަތުރުގެ ވަރުބަލިކަން ފިލައި، ހިތަށް ބޮޑު ހަމަޖެހުމެއް ލިބުނުކަން އޭނާ ފާހަގަކުރިއެވެ. މިއީ އެތައް ދުވަހެއްގެ ހުވަފެނެއް ހަގީގަތަކަށް ވެގެންދިޔަ އުފާވެރި ވަގުތުކޮޅެކެވެ.

”މީގެ ކުރިން އަހަރެން ހީކުރީ ހައްޖުގެ ހުވަފެން ހަގީގަތަކަށް ހެދުމަކީ ވަރަށް އުނދަގޫ ކަމެއް ކަމަށް. އަދި މާތް ބިންތަކަށް ޒިޔާރަތްކުރުމުގެ ފުރުސަތެއް މީގެ ކުރިން ލިބިފައެއް ނުވޭ. ނަމަވެސް، މި އަހަރުގެ ހައްޖާޖީންގެ ތެރޭގައި އަހަރެން ހިމެނުނުކަން އެނގުމާއެކު، މިއީ މާތްﷲގެ ފަޟްލުވަންތަކަމާއި ދީލަތިވަންތަކަމުން މި މަތިވެރި އަޅުކަން އަދާކުރުމަށް އަހަރެންނަށް މިންވަރުކުރެއްވި ފުރުސަތެއްކަން ޔަގީންވި.“ ސައުދީ ޕްރެސް އެޖެންސީއަށް ދިން އިންޓަވިއުއެއްގައި އައިޝާ ބުންޏެވެ.

މި ބަރަކާތްތެރި ދަތުރުގައި އައިޝާގެ އެހީތެރިއަކަށް އިހުތިޔާރުކުރީ އޭނާގެ ކޮއްކޮ، އުމުރުން 10 އަހަރު ހަގު އަލް-ޒަހްރާ އެވެ. ދެބެއިން އެކުގައި ދަތުރުކުރަނީ އަޅުކަން ގަބޫލުކުރެއްވުމަށް އެދި ދުއާކުރަމުންނެވެ. ”މައްކާ ރޫޓް އިނީޝިއޭޓިވް“ އާ ބެހޭގޮތުން އައިޝާއަށް މައުލޫމާތު ދިނީވެސް އޭނާގެ ކޮއްކޮއެވެ.